contoh pidato jawa

SESORAH BASA JAWA

TEMA : SEMANGATE PARA PAHLAWAN WANITA

Gambuh

Mangkana patrapipun,

Wiwit anem amandengan laku,

Ngengurangi pangan turu sawetawis,

Amemekak hawa nepsu,

Dhasarana andhap asor.   

Assalamu’alaikum Wr. Wb

Panjenenganipun Bapak Rektor UST ingkang kinurmatan, Bapak – ibu Dewan Yuri saha bapak – ibu Guru ingkang luhuring budi, para rawuh sarta kanca-kanca ingkang bagya mulya. Langkung rumiyin mangga kula lan panjenengan sedaya ngaturaken puja  - puji  syukur dhumateng Gusti Allah ingkang sampun  paring karahmatan, hidayah sarta inayahipun. Kacihna ing ri kalenggahan punika kula lan panjenengan sedaya saged makempal wonten ing mriki kanthi widada nir ing sambekala.

Bapak  – Ibu Dewan Yuri saha Para lenggah ingkang kinurmatan, ing kalodhangan menika  keparenga kula  badhe ngaturaken sesorah kanthi tema  ” SEMANGATE PARA PAHLAWAN WANITA”.

Negari Republik  Indonesia mardika rikala tahun 1945. Kathah bebanten putra - putri Indonesia saha bandha donya ingkang  boten sekedhik dipunkorbanaken kangge nggayuh kamardikan. Para mudha – mudhi sami cancut tali wanda  gumregah berjuang kangge nggayuh kamardikan negari Indonesia kanthi cara  miturut kesagedanipun piyambak – piyambak. Wonten ingkang berjuang kanthi magut yuda ing palagan, wonten ingkang berjuang  ing bidang politik, budaya saha pamulangan.

Para kusumaning bangsa menika boten namung  para priya kemawon, ananging boten sekedhik  ugi para wanita utawi Srikandhi Indonesia ingkang sampun ngorbanaken jiwa,  raga, bandha lan penggalihan kangge kamardikaning negari Indonesia. Para kusumaning bangsa utawi pahlawan wanita Indonesia kala wau  inggih menika: Cut Nyak Dien, Cut Nyak Muthia, Marta Kristina Tiyahahu, R Dewi Sartika,    Raden  Ajeng  Kartini, Maria Walanda Maramis, Nyi Ageng Serang, saha  Hj. Rasuna Said. Para  Sri Kandhi – Sri Kandhi  Indonesia menika boten rila menawi negari Indonesia ingkang gemah ripah loh jiwani menika karegem dening penjajah.

Para pahlawan putri menika nilaraken kamuktenipun  berjuang kangge nggayuh kamardikan. Sanadyan  wanita nanging panjenenganipun kagungan tekad lan semangat ingkang boten kalah kaliyan  para priya. Wonten ingkang  perang ngadhepi mengsah, wonten ingkang berpolitik, wonten ingkang berjuang ing donyaning pendidikan. Ingkang berjuang ing donyaning pendidikan antawisipun R A Kartini. Raden Ajeng Kartini kagungan penggalihan menawi para wanita Indonesia sami pinter-pinter tamtu bangsa Indonesia dados pinter, amargi para wanita menika ingkang nggulawenthah para putra-putranipun.

Labuh labetipun R. A. Kartini saestu luhur sanget tumrap kaum wanita. Langkung-langkung ing wekdal  samenika ingkang taksih kedah meres penggalih kangge majengipun bangsa. Panyengkuyungipun para wanita boten saged dipunremehaken, malah kepara langkung bobotipun tumrap pembangungan majengipun bangsa Indonesia.

Sampun dados kodratipun menawi wanita menika nggadhahi raos ingkang langkung alus, sanadyan mekaten greget ing manah tansah makantar-kantar pindha waja ngudi kautaman. Sedaya menika  inggih awit lelabetanipun Ibu Kartini ingkang sampun tumanem ngrembaka ing manahipun wanita Indonesia.

Para rawuh saha para kanca ingkang bagya mulya, kanthi nyimak sejarah perjuangan para pahlawan wanita menika, sumangga kita sedaya mliginipun para siswa saged nulad tekad  lan semangat sarta saged  nglajengaken cita-citanipun para pahlawan kanthi sinau ingkang tumemen,  ngisi kamardikan kanthi  pakarti ingkang sae, saged mrantasi sadhengah karya sarta  mbangun negari Indonesia dados negari ingkang langkung makmur, berdaulat.sarta bermartabat.

Wasana cekap semanten atur kula, bok bilih wonten ceweting atur saha kiranging suba sita kula nyuwun agunging samodra pangaksama.

Tuku kupat dibuntel janur tuwa, menawi wonten lepating atur, nyuwun pangaksama.

Wassalamu’alaikum Wr. Wb

Nuwun